આણંદ(Anand)માં ઝેરી ગેસનો ખળભળાટ: 200 બબ્લર પક્ષીઓના મોત, 500 વીઘા પાકને નુકસાનનો આક્ષેપ; GPCB તપાસમાં

આણંદ (Anand) જિલ્લાના ખંભાત તાલુકાના વટાદરા અને વત્રા ગામની સીમ વિસ્તારમાં કથિત રીતે ઝેરી ગેસ છોડવામાં આવ્યો હોવાના આક્ષેપ બાદ ચકચાર મચી છે. સ્થાનિક ખેડૂતોના જણાવ્યા મુજબ ગેસના કારણે લગભગ 200 જંગલી બબ્લર પક્ષીઓનાં મોત થયા છે, જ્યારે ખેતરોમાં ઉભેલો લીલો ડાંગરનો પાક પીળો પડી ગયો છે. ખેડૂતો દ્વારા આશરે 400થી 500 વીઘા પાકને નુકસાન થયાનો આક્ષેપ કરવામાં આવ્યો છે.હાલ આણંદમાં સમગ્ર મામલે GPCB અને વનવિભાગ દ્વારા તપાસ હાથ ધરવામાં આવી રહી છે. પક્ષીઓના પોસ્ટમોર્ટમ માટે સેમ્પલ FSLમાં મોકલવામાં આવ્યા છે, જ્યારે હવા અને સંબંધિત કંપનીઓની ચિમનીમાંથી પણ સેમ્પલ લેવામાં આવી રહ્યા છે.

આણંદ (Anand) ના ખંભાતમાં ગેસની દુર્ગંધથી લોકો પરેશાન

(Anand) વટાદરા અને વત્રા ગામની સીમ વિસ્તારમાં કથિત ગેસ ફેલાવાની ઘટના બાદ સ્થાનિકોમાં ચિંતા જોવા મળી હતી. ગ્રામજનોના જણાવ્યા પ્રમાણે કેટલાક લોકોને શ્વાસ લેવામાં તકલીફ, ગૂંગળામણ અને આંખોમાં બળતરા જેવી સમસ્યાઓ થઈ હતી. કેટલાક લોકોને ઉલ્ટીની પણ ફરિયાદ થઈ હોવાનું સ્થાનિકોએ જણાવ્યું છે.ગેસની તીવ્ર દુર્ગંધ અનુભવાઈ હોવાનો પણ ગ્રામજનોનો દાવો છે.

લીલો ડાંગરનો પાક પીળો પડી ગયો

સ્થાનિક ખેડૂતોના આક્ષેપ મુજબ કથિત ગેસ ફેલાયા બાદ ખેતરોમાં ઉભેલો લીલો ડાંગરનો પાક પીળો પડવા લાગ્યો હતો. ખેડૂતોના પ્રાથમિક અંદાજ પ્રમાણે આશરે 400 વીઘા જેટલા પાકને નુકસાન થયું છે.સ્થાનિક ખેડૂત સુજલ પટેલના જણાવ્યા મુજબ નુકસાનનો વિસ્તાર આશરે 500 વીઘા સુધીનો હોઈ શકે છે.

ઝાડ પરથી ટપોટપ પક્ષીઓ નીચે પડ્યા

ઘટનાનો સૌથી ચોંકાવનારો દાવો પક્ષીઓના મોતને લઈને સામે આવ્યો છે. ગ્રામજનોના જણાવ્યા મુજબ ઝાડ પર બેઠેલા બબ્લર પક્ષીઓ અચાનક તડફડાટ સાથે નીચે પડવા લાગ્યા હતા.થોડા સમય બાદ મોટી સંખ્યામાં પક્ષીઓ મૃત હાલતમાં મળી આવતા વિસ્તારમાં ચિંતા ફેલાઈ હતી. સ્થાનિકોના જણાવ્યા મુજબ સ્થળ પર ગેસની તીવ્ર દુર્ગંધ પણ અનુભવાઈ હતી.

200 જેટલા બબ્લર પક્ષીઓના મોત

મૃત પક્ષીઓ અંગે વનવિભાગે કાર્યવાહી શરૂ કરી છે. (Anand) ખંભાત રેન્જ ફોરેસ્ટ ઓફિસર દેસાઈના જણાવ્યા મુજબ મૃત જંગલી બબ્લર એટલે કે વન લલેડુ પક્ષીઓને પોસ્ટમોર્ટમ માટે પશુ દવાખાના ખાતે ખસેડવામાં આવ્યા છે.વનવિભાગની ટીમે ઘટનાસ્થળે પહોંચી મૃત પક્ષીઓને કબજે લઈ પોસ્ટમોર્ટમની કાર્યવાહી હાથ ધરી છે.

મોતનું કારણ જાણવા સેમ્પલ FSLમાં મોકલાયા

(Anand) ખંભાતના પશુ ચિકિત્સા અધિકારી ડૉ. ઋચિક આંજણાના જણાવ્યા મુજબ પેનલ ડોક્ટર દ્વારા મૃત પક્ષીઓનું પોસ્ટમોર્ટમ કરવામાં આવ્યું છે. પક્ષીઓના મોતનું ચોક્કસ કારણ જાણવા માટે જરૂરી સેમ્પલ લેવામાં આવ્યા છે.આ સેમ્પલ FSLમાં મોકલવામાં આવ્યા છે. FSL રિપોર્ટ આવ્યા બાદ જ પક્ષીઓના મોતનું સચોટ કારણ જાણી શકાશે.

આ પણ વાંચો :  સુરત(Surat)માં બે દિવસમાં બીજી દારૂની મહેફિલ ઝડપાઈ: ડુમસની લક્ઝરી બિલ્ડિંગમાંથી 6 કાપડ વેપારી ઝડપાયા, ₹10.07 લાખનો મુદ્દામાલ જપ્ત

GPCBએ હવા અને કંપનીની ચિમનીના સેમ્પલ લેવાની કાર્યવાહી શરૂ કરી

GPCB આણંદ (Anand) ના રિજનલ ઓફિસર પવન શર્માના જણાવ્યા મુજબ ટીમ દ્વારા સ્થળ પર તપાસ હાથ ધરવામાં આવી રહી છે. ટીમે ખેતર, ઝાડ સહિત આસપાસના વિસ્તારોનું નિરીક્ષણ કર્યું છે.આ ઉપરાંત સંબંધિત કંપનીઓની પણ મુલાકાત લઈને તપાસ કરવામાં આવી રહી છે. GPCB દ્વારા Ambient Airના સેમ્પલ લેવામાં આવી રહ્યા છે. સાથે જ સંબંધિત કંપનીઓની ચિમનીમાંથી પણ સેમ્પલ લેવામાં આવશે.સેમ્પલના પરિણામો અને તપાસના આધારે જો નિયમભંગ અથવા ઝેરી ગેસ છોડવાની બાબત સામે આવશે તો જરૂરી કાર્યવાહી કરવામાં આવશે.

પ્રાંત અધિકારી અને મામલતદારને રજૂઆત

આ સમગ્ર મામલે જાગૃત નાગરિકો દ્વારા પ્રાંત અધિકારી તેમજ મામલતદારને ઈ-મેલ મારફતે રજૂઆત કરવામાં આવી છે. કથિત રીતે ઝેરી ગેસ છોડતી કંપનીઓ સામે પ્રદૂષણ નિયંત્રણ બોર્ડ દ્વારા તાત્કાલિક તપાસ કરાવવામાં આવે અને જવાબદારો સામે ફરિયાદ દાખલ કરીને કાર્યવાહી કરવામાં આવે તેવી માંગ કરવામાં આવી છે.

તપાસ બાદ જ હકીકત સ્પષ્ટ થશે

હાલ આણંદ (Anand) ના ખંભાતમાં પક્ષીઓના મોત અને પાકને થયેલા નુકસાન અંગે તપાસ ચાલી રહી છે. મૃત પક્ષીઓના પોસ્ટમોર્ટમ બાદ FSL રિપોર્ટ, હવામાંથી લેવાયેલા સેમ્પલ અને કંપનીની ચિમનીમાંથી લેવામાં આવનારા સેમ્પલના પરિણામો મહત્વપૂર્ણ રહેશે.હાલ ઝેરી ગેસના કારણે જ પક્ષીઓનાં મોત અને પાકને નુકસાન થયું હોવાનું સત્તાવાર રીતે સાબિત થયું નથી. તપાસ અને રિપોર્ટ બાદ જ સમગ્ર ઘટનાનું સાચું કારણ સ્પષ્ટ થશે.

નોંધ : આ વેબસાઈટ પર આપેલી તમામ ન્યૂઝ અને વાતો રીપોર્ટર દ્વારા રિપોર્ટ કરેલા છે. અથવા તો કોઈક સોર્સ ઉપરથી માહિતી લેવામાં આવેલા છે. ન્યૂઝ તથા અન્ય વાતોની જવાબદારી જે તે લેખક તથા સોર્સની રહેશે. “divyangnewschannel.com” વેબસાઈટ કે પેજ ની કોઈપણ પ્રકારની જવાબદારી રહેશે નહી