વડોદરાના નાગરિકોને સરળ અને પારદર્શક સેવા ક્યારે મળશે? તરસાલીમાં Learning License સેન્ટરમાં ઉદાસીનતા, આરટીઓના અધિકારી કે સુપરવાઈઝરની નિમણૂક કરાઈ નથી
ZENSI PATEL 
આરટીઓ વિભાગના વધતા કામનો ભાર ઘટાડવા માટે રાજ્ય સરકાર દ્વારા શહેરની વિવિધ આઈ.ટી.આઈમાં લર્નિંગ લાયસન્સ (Learning License) સેન્ટરો શરૂ કરવામાં આવ્યા છે. આ જ અનુસંધાને વડોદરા શહેરના તરસાલી વિસ્તારમાં આવેલી ઔદ્યોગિક તાલીમ સંસ્થામાં પણ લર્નિંગ લાયસન્સ (Learning License) સેન્ટર શરૂ કરવામાં આવ્યું છે. પરંતુ આ સેન્ટરની કામગીરીને લઈને ગંભીર પ્રશ્નો ઊભા થયા છે.
RTO અધિકારી વગર ચાલતું લર્નિંગ લાયસન્સ (Learning License) સેન્ટર
આરટીઓ દ્વારા શરૂ કરાયેલા આ લર્નિંગ લાયસન્સ (Learning License) સેન્ટરમાં આરટીઓના કોઈપણ અધિકારી કે સુપરવાઈઝરની નિમણૂક કરવામાં આવી નથી. પરિણામે આ સેન્ટરની સંપૂર્ણ કામગીરી ઔદ્યોગિક તાલીમ સંસ્થાના કર્મચારીઓ દ્વારા ચલાવવામાં આવી રહી છે. સ્થાનિક લોકોનો આક્ષેપ છે કે આઈ.ટી.આઈના કર્મચારીઓને આરટીઓના નિયમો, કાયદા તેમજ લર્નિંગ લાયસન્સ સંબંધિત પ્રક્રિયાની પૂરતી જાણકારી નથી. છતાં પણ તેમને આ જવાબદારી સોંપવામાં આવતા અરજદારોને વારંવાર મુશ્કેલીનો સામનો કરવો પડી રહ્યો છે.
ખોટી માહિતી, પ્રક્રિયામાં વિલંબના કારણે નાગરિકો પરેશાન
લર્નિંગ લાયસન્સ (Learning License) માટે આવતા શહેરના નાગરિકો કહે છે કે ખોટી માહિતી, પ્રક્રિયામાં વિલંબ અને યોગ્ય માર્ગદર્શનના અભાવે તેઓ પરેશાન થઈ રહ્યા છે. સરકારનો ઉદ્દેશ આરટીઓનું ભારણ ઘટાડવાનો હતો, પરંતુ યોગ્ય દેખરેખના અભાવે હવે આ સેન્ટર લોકો માટે મુશ્કેલીનું કારણ બની રહ્યું છે. હવે પ્રશ્ન એ ઊભો થાય છે કે આરટીઓ વિભાગ ક્યારે આ સેન્ટર પર યોગ્ય અધિકારીઓની નિમણૂક કરશે અને શહેરના નાગરિકોને સરળ અને પારદર્શક સેવા ક્યારે મળશે?
નોંધ : આ વેબસાઈટ પર આપેલી તમામ ન્યૂઝ અને વાતો રીપોર્ટર દ્વારા રિપોર્ટ કરેલા છે. અથવા તો કોઈક સોર્સ ઉપરથી માહિતી લેવામાં આવેલા છે. ન્યૂઝ તથા અન્ય વાતોની જવાબદારી જે તે લેખક તથા સોર્સની રહેશે. “divyangnewschannel.com” વેબસાઈટ કે પેજ ની કોઈપણ પ્રકારની જવાબદારી રહેશે નહી
